ខេត្តមណ្ឌលគិរី៖ដោយសារការចោទប្រកាន់គ្នារឿងសែបគ្រឿងញៀន រហូតឈានដល់ការកាប់ចាក់គ្នា បណ្តាលឱ្យព្រះសង្ឃ១អង្គសុគតខណ:បញ្ជួនទៅមន្ទីរពេទ្យ ដល់ពាក់កណ្តាលផ្លូវ និង១អង្គទៀត​ជាប់កុក។

បើតាមប្រភពព័ត៌មានបានឱ្យដឹងថា មុនកើតហេតុសង្ឃដៃឆៅ១អង្គ ដែលរងនូវពាក្យប្រមាថពី​សង្ឃដូច​គ្នាពុំ​បាន ក្រោយពីសង្ឃនោះចោទថាខ្លួនសែបគ្រឿងញៀន ក៏បានផ្ទុះកំហឹង វាយដោយ​ដំបងនឹងចាក់ដោយកាំបិតសម្លាប់ក្នុងទីអារាមមួយហៅថាវត្តដេអេ ស្ថិតក្នុងស្រុកពេជ្រាដា ខេត្តមណ្ឌ​លគិរី បណ្តាលឱ្យស្នាមរបួសចំនួន៣កន្លែងដោយដំបងនឹងកាំបិតចុងស្រួច បានចាក់ទំលុះទ្រូង​ផ្នែក​ខាងស្តាំនិងផ្នែកខាងក្រោយ ធ្លាយដល់សួតនិងពោះវៀន បណ្តាលឱ្យព្រះសង្ឃរងគ្រោះសុគត ខណ:​បញ្ជួនទៅមន្ទីរពេទ្យដើម្បីសង្គ្រោះ ដល់ពាក់កណ្តាលផ្លូវ។ចំណែកព្រះសង្ឃដៃឆៅ ត្រូវពុទ្ធប​រិស័ទនិងព្រះសង្ឃក្នុងវត្តចាប់ផ្សឹក រួចបញ្ជួនឱ្យសមត្ថកិច្ចជំនាញភ្លាមៗផងដែរ។

លោកឧត្តមសេនីយ៍ត្រី សូ សុវណ្ណ ស្នងការរងនគរបាលខេត្តមណ្ឌលគិរី បានឱ្យដឹងថា ជនដៃដល់​និង​ត្រូវបញ្ជួនមកស្នងកាដ្ឋាននគរបាលខេត្តមណ្ឌលគិរី នឹងបញ្ជូនទៅអយ្យការ​អមសាលាដំបូង​ខេត្ត​មណ្ឌលគិរី ក្រោយសួរនាំ និងកសាងសំណុំចប់។ 

លោកបន្តថា ករណីឃាតកម្ម ដោយចេតនាកើតឡើង០១​ករណី​ប្រព្រឹត្តឡើងដោយ​ជនសង្សយ័​ឈ្មោះ​ធឿន នី ភេទប្រុស អាយុ៣៩ឆ្នាំ ជនជាតិខ្មែរមុខរបរព្រះសង្ឃ មានទីកន្លែងកំណើ​តភូមិត្រ​បែក ឃុំទឹកជ្រៅ ស្រុកតំបែរ ខេត្តកំពង់ចាម ទីលំនៅបច្ចុប្បន្នព្រះសង្ឃគង់នៅវត្តដេអេ ស្ថិតនៅភូមិចុ​ងផាង ឃុំពូជ្រៃ ស្រុកពេជ្រាដា ខេត្តមណ្ឌលគីរី។ចំណែកជនរងគ្រោះឈ្មោះ ថ្លាង វុធ ភេទប្រុស អាយុ២៤ឆ្នាំ ជនជាតិខ្មែរ មុខរបរព្រះសង្ឃ មានទីកន្លែងកំណើតភូមិទឹកជ្រៅ ឃុំទឹកជ្រៅ ស្រុកតំបែរ ខេត្តកំពង់ចាម ទីលំនៅបច្ចុប្បន្នជាព្រះសង្ឃគង់នៅវត្តដេអេ ស្ថិតនៅភូមិចុងផាង ឃុំពូជ្រៃ ស្រុកពេ​ជ្រាដា ខេត្តមណ្ឌលគិរី។

ជនរងគ្រោះ ត្រូវបានជនសង្ស័យប្រើកាំបិតចុងស្រួចចាក់ត្រូវ​ ទ្រូងខាងស្តាំលើដោះទំហំ​៥ស.មជំរៅ​ ដល់សួត​ ផ្នែកខាងក្រោយចាក់ចូលចន្លោះឆ្អឹងជំនីទី៧+៨ទំហំ៦ស.ម​ ជំរៅ​ ដល់ពោះវៀន​។

មូលហេតុ:ទាស់សំដីគ្នារឿងជនរងគ្រោះចោទប្រកាន់ជនសង្ស័យថា ប្រើប្រាស់គ្រឿងញៀន ។លោកស្នងការរងបញ្ជាក់ថា ជនដៃដល់កាលនៅពុំទាន់បួសធ្លាប់ប្រើប្រាស់គ្រឿងញៀនពិតមែន តែក៏បួសជាសង្ឃនិងឈប់ប្រើប្រាស់រយៈពេល២ឆ្នាំទៅហើយ ហើយក្រោយតេស្តទឹក​នោមរកសារ​ធាតុ​ញៀនមិនឃើញដែរ។

បច្ចុប្បន្នសពជនរងគ្រោះ ត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕