បុរសម្នាក់បានស្លាប់ភ្លាមៗ ដោយសារបើកម៉ូតូខ្វះការប្រុងប្រយ័ត្ន បុកគូទរថយន្តស៊ីទែនដឹកទឹកឈប់ស្ងៀម មិនដាក់ផ្លាកសញ្ញា
ខេត្តកំពង់ស្ពឺ៖ឧបទ្ទវហេតុគ្រោះថ្នាក់ចរាចរណ៍ដ៏រន្ធត់មួយបានកើតឡើង ដោយបុរសម្នាក់បានបើកម៉ូតូខ្វះការប្រុងប្រយ័ត្ន ទៅបុកគូទរថយន្តស៊ីទែនដឹកទឹក១គ្រឿងឈប់ស្ងៀមលើចញ្ចើមផ្លូវ មិនដាក់ផ្លាកសញ្ញា ពីក្រោយយ៉ាងពេញទំហឹង បណ្ដាលឱ្យស្លាប់ភ្លាមៗនៅកន្លែងកើតហេតុ។
ករណីនេះបានកើតឡើងកាលពីថ្ងៃទី១៩ ខែកុម្ភៈ ឆ្នាំ២០២០ នៅលើផ្លូវជាតិលេខ៥១ ចន្លោះគីឡូម៉ែត្រលេខខាងលើត្រង់ចំណុចភូមិស្តុកស្លាត ឃុំភ្នំតូច ស្រុកឩដុង្គ ខេត្តកំពង់ស្ពឺ។
ប្រភពពីប្រជាពលរដ្ឋបានឱ្យដឹងថា មុនពេលកើតហេតុគេបានឃើញម៉ូតូ១គ្រឿងម៉ាកហុងដាC125 ពណ៌ខ្មៅ ពាក់ស្លាកលេខកំពង់ស្ពឺ1I. 9360 បើកបរដោយឈ្មោះ ភឿក រិតដេត ភេទប្រុស អាយុ៣0 ឆ្នាំ(ស្លាប់) រស់នៅភូមិពីងពង់ ឃុំដំណាក់រាំង ស្រុកឧដុង្គ ខេត្តកំពង់ស្ពឺ បានធ្វើដំណើរទិសដៅពីត្បូងទៅជើង លុះទៅដល់ចំណុចកើតហេតុខាងលើ បានបើកទៅបុកគូទរថយន្ត១គ្រឿង ម៉ាកKIA ពណ៌ ស ពាក់ផ្លាកលេខភ្នំពេញ 3D. 9142 (ប្រភេទស៊ីទែនដឹកទឹក) អ្នកបើកបរមិនស្គាល់ឈ្មោះ ដែលកំពុងឈប់ចតនៅលើផ្លូវក្នុងទិសដៅស្របទិសគ្នា បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ។
ក្រោយពេលកើតហេតុភ្លាមម្ចាស់រថយន្តបានរត់គេចខ្លួនបាត់បន្សល់រថយន្តនៅកន្លែងកើតហេតុ។វត្ថុតាងមធ្យោបាយទាំអពីសមត្ថកិច្ចបានយកទៅរក្សាទុកនៅផ្នែកចរាចរណ៍ផ្លូវគោក នៃ អធិការដ្ឋាននគរបាលស្រុកឧដុង្គ រងចាំដោះស្រាយតាមផ្លូវច្បាប់ជាក្រោយ។ដោយឡែងសពប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕