ពលរដ្ឋប្រទះឃើញសពស្ត្រីម្នាក់ ដេកស្លាប់នៅក្នុងស្រែ ក្បែរព្រៃមួយកន្លែង ខណ្ឌដង្កោ
រាជធានីភ្នំពេញ៖សពស្ត្រីម្នាក់ត្រូវបានពលរដ្ឋប្រទះឃើញដេងស្លាប់នៅក្នុងស្រែ ក្បែរព្រៃមួយកន្លែង ស្ថិតក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ បង្កការភ្ញាក់ផ្អើលនៅថ្ងៃទី១៨ ខែកុម្ភ: ឆ្នាំ២០២០។
សពរងគ្រោះមានឈ្មោះ ឈន់ ឌី ភេទស្រី អាយុ៤៣ឆ្នាំ មុខរបរនៅផ្ទះ មានទីលំនៅ ភូមិជាខ្លាង ឃុំជាខ្លាង ស្រុកស្វាយអន្ទរ ខេត្តព្រៃវែង មានកូនប្រុសអាយុ៥ឆ្នាំម្នាក់។
បើតាមការបញ្ជាក់ពីប្តីរបស់ជនរងគ្រោះឈ្មោះ អន ថុន ភេទប្រុស អាយុ៤១ឆ្នាំ មានទីលំនៅជាមួយគ្នា បានឲ្យដឹងថា ប្រពន្ធរបស់ខ្លួន(សព) ធ្លាប់ជួបគ្រោះថ្នាក់ចរាចរណ៍ និងមានជំងឺសរសៃប្រសាទប្រចាំកាយ កន្លងមកខាងក្រុមគ្រួសារក៏ធ្លាប់ធ្វើការឃុំខ្លួនទុកក្នុងផ្ទះ ដោយមិនឲ្យដើរទៅណាឡើយ ព្រោះខ្លាចបាត់ពីផ្ទះ លុះក្រោយមកក៏មានកម្មវិធីបុណ្យនៅជិតផ្ទះ ទើបអ្នកផ្ទះអនុញ្ញាតឲ្យជនរងគ្រោះ ទៅចូលរួមកម្មវិធីបុណ្យស្រាប់តែគាត់បានលួចជិះឡានមកភ្នំពេញបាត់។
ប្រភពដដែលបន្តថា ពេលនោះគាត់ជាប្ដី និងក្រុមគ្រួសារព្យាយាមដើរស្វែងរក តែមិនឃើញអស់រយៈពេលជាច្រើនខែទៅហើយ ទើបនៅថ្ងៃកើតហេតុនេះក៏ទទួលដំណឹងថា ប្រពន្ធគាត់បានស្លាប់បាត់ទៅហើយ។
តាមប្រភពសពអាចស្លាប់ដោយសារ ការអត់អាហាររយ:ពេលយូរ មានជំងឺសរសៃប្រាសាទ មិនជាប់ពាក់ព័ន្ធករណីឃាតកម្មឡើយ។ក្រោយពីសមត្ថកិច្ចធ្វើកំណត់ហេតុរួច បានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី៕