រដ្ឋបាលខេត្តសៀមរាប ទទួលជួបពិភាក្សាការងារ ជាមួយគណៈប្រតិភូក្រុមហ៊ុន Beijing Jingneng Power Co.,Ltd វិនិយោគរោងចក្រផលិតថាមពលអគ្គិសនី
ខេត្តសៀមរាប៖ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានគាំទ្រលើគម្រោងវិនិយោគបង្កើតរោងចក្រផលិតថាមពលអគ្គិសនី របស់ក្រុមហ៊ុនBeijing Jingneng Power Co.,Ltd ខណៈដែលខេត្តសៀមរាប កំពុងមានការខ្វះខាតអគ្គិសនីប្រើប្រាស់ហើយតម្រូវការប្រើប្រាស់មានការកើនឡើងជារៀងរាល់ឆ្នាំផងដែរ។
ឯកឧត្តមមានប្រសាសន៍គាំទ្របែបនេះ ក្នុងកិច្ចជំនួបពិភាក្សាការងាររវាងរដ្ឋបាលខេត្ត និងគណៈប្រតិភូក្រុមហ៊ុន Beijing Jingneng Power Co.,Ltd វិនិយោគរោងចក្រផលិតថាមពលអគ្គិសនី កាលពីព្រឹកថ្ងៃព្រហស្បតិ៍ ១រោច ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១២ ខែធ្នូ ឆ្នាំ២០១៩ ដោយមានការអញ្ជើញចូលរួមពីសំណាក់លោក ង៉ាន់ ភិរុណ អភិបាលរងខេត្ត នាយករងរដ្ឋបាលសាលាខេត្ត នាយកទីចាត់ការអន្តរវិស័យសាលាខេត្ត នាយកទីចាត់ទំនាក់ទំនងសាធារណ: និងសហប្រតិបត្តិការអន្តរជាតិសាលាខេត្ត តំណាងទីចាត់ការផែនការ និងវិនិយោគសាលាខេត្ត ប្រធានមន្ទីរបរិស្ថានខេត្ត តំណាងមន្ទីររ៉ែ និងថាមពលខេត្ត និងមន្រ្តីជំនាញពាក់ព័ន្ធនានា ផងដែរ។
ក្នុងកិច្ចពិភាក្សាការងារនេះ តំណាងក្រុមហ៊ុនបានស្នើសុំអោយរដ្ឋបាលខេត្ត ជួយរកដី ឬជួលដី ដែលមានតម្លៃទាប ប្រសិនបើក្រុមហ៊ុនទិញ ឬជួលដី ដែលមានតម្លៃថ្លៃពេក ក្រុមហ៊ុនក៏លក់អគ្គិសនីក្នុងតម្លៃថ្លៃដែរ ហើយនឹងត្រូវវិនិយោគរយៈពេលយូរទើបក្រុមហ៊ុនអាចទទួលបានផលចំណេញ ជួយគាំទ្រគម្រោងរបស់ក្រុមហ៊ុន និងជួយសម្របសម្រួលបន្ធូរបន្ថយពន្ធ និងជួយទិញអគ្គិសនីពេលក្រុមហ៊ុនផលិតបាន។
ជាការឆ្លើយតបនឹងការស្នើសុំ ឯកឧត្តម អភិបាលខេត្ត បានគាំទ្រលើគម្រោងវិនិយោគបង្កើតរោងចក្រផលិតអគ្គិសនី ចំពោះក្រុមហ៊ុន ដែលមិនធ្វើឱ្យប៉ះពាល់បរិស្ថាននៅក្នុងខេត្តសៀមរាប។ឯកឧត្តម បានបន្ថែមទៀតថា នឹងជួយសម្របសម្រួលនីតិវិធីច្បាប់ នៅពេលដែលក្រុមហ៊ុនទទួលបានការអនុញ្ញាតលើគម្រោងវិនិយោគពីក្រុមប្រឹក្សាអភិវឌ្ឍន៍កម្ពុជា និងទទួលបានគោលការណ៍ពីរាជរដ្ឋាភិបាលហើយ រដ្ឋបាលខេត្ត នឹងចុះអនុស្សារណៈជាមួយក្រុមហ៊ុននៅពេលទទួលបានសិទ្ធិពីថ្នាក់ជាតិ។
ឯកឧត្តម ក៏បានបញ្ជាក់ថា នៅខេត្តសៀមរាប ការប្រើប្រាស់អគ្គិសនី បានគ្របដណ្តប់ប្រហែល ៨០% ដែលមានបណ្តាញខ្សែមកពីប្រទេសថៃចំនួន១១៥ មេកាវ៉ាត់ និងមកពីវារីអគ្គិសនីខេត្តពោធិ៍សាត់ទំហំ២៣០មេកាវ៉ាត់ ហើយនឹងមានថាមពលអគ្គិសនីមកពីសេសានទំហំ៤០០ មេកាវ៉ាត់ក្នុងពេលខាងមុខ៕