ពលករខ្មែរចំណាក់ស្រុកទៅថៃ ជួបគ្រោះថ្នាក់ចរាចរណ៍ បណ្តាលឱ្យស្លាប់ម្នាក់ និង១១នាក់ទៀតរងរបួស
ខេត្តបន្ទាយមានជ័យ៖យ៉ាងហោចពលករខ្មែរចំណាក់ស្រុកទៅប្រទេសថៃ ម្នាក់ជាស្ត្រីបានស្លាប់ភ្លាមៗ និង១១នាក់ផ្សេងទៀតរបួសធ្ងន់ ស្រាល ដឹកបញ្ជូនទៅសង្គ្រោះនៅឯមន្ទីពេទ្យ ដោយសារជួបឧបទ្ទវហេតុគ្រោះថ្នាក់ចរាចរណ៍ រវាងរថយន្តបុក រថយន្តខ្ទេចអស់ទាំង២គ្រឿង កាលពីនៅវេលាម៉ោង១០ព្រឹក ថ្ងៃទី១៨ ខែកុម្ភៈ ឆ្នាំ២០២០ នៅម្ដុំផ្លូវជាតិអេសៀររ៉ាត់ត ស្ថិតនៅក្នុងភូមិ៤ សង្តាត់ថាឆាង ស្រុកបាងក្លាំ ខេត្តសង់ក្លា ប្រទេសថៃ។
សមត្ថកិច្ចថៃបានរាយការណ៍ប្រាប់សមត្ថកិច្ចខ្មែរឲ្យដឹងថា នៅមុនពេលកើតហេតុនោះ រថយន្តឈ្នួលរបស់ជនជាតិថៃ បានធ្វើដំណើរទៅទទួលពលករខ្មែរចំនួន១២នាក់ ពីព្រុំដែនស្រុកអារញ្ញយ៉ាប្រាថេត ដើម្បីបន្តដំណើរទៅខេត្តសង់ក្លា ប៉ុន្ដែអកុសលរថយន្តឈ្នួលខាងលើបើកក្នុងល្បឿនផ្តាច់ព្រលឹង បានជ្រុលទៅបុកគូទរថយន្តសណ្ដោងតាមផ្លូវ បណ្ដាលឲ្យមានមនុស្សស្រី១នាក់ស្លាប់ និងរបួស ធ្ងន់ស្រាល១១នាក់។
សមត្ថកិច្ចបានបញ្ជាក់ឲ្យដឹងទៀតថា ក្រោយពីកើតហេតុសមត្ថកិច្ចថៃបានបញ្ជូនជនរងគ្រោះយកទៅព្យាបាលនៅមន្ទីរពេទ្យបាងក្លាំ និងមន្ទីរពេទ្យហាតយ៉ៃខេត្ដសង់ក្លាភ្លាមៗផងដែរ។ចំណែកសពសមត្ថកិច្ចថៃកំពុងធ្វើការទំនាក់ទំសមត្ថមិច្ចខ្មែរ ដឹកយកប្រគល់ទៅឲ្យគ្រួសារសពយកទៅធ្វើបុណ្យនៅស្រុកកំណើតតាមប្រពៃណី។រីឯរថយន្តសមត្ថកិច្ចយកទៅដោះស្រាយតាមនិតិវិធីច្បាប់របស់ថៃ៕
