ផ្ទុះម៉ីនតោន១គ្រាប់ នៅស្រុកភ្នំព្រឹក បណ្តាលឲ្យអ្នកបើកបរត្រាក់ទ័រម្នាក់រងរបួស បញ្ជូនទៅសង្គ្រោះនៅមន្ទីពេទ្យ
ខេត្តបាត់ដំបង៖បុរសជាតៃកុងត្រាក់ទ័រម្នាក់បានរងរករបួសធ្ងន់ បញ្ជូនទៅសង្គ្រោះនៅឯមន្ទីពេទ្យ រីឯត្រាក់ទ័ររងការខូចខាតស្ទើរទាំងស្រុង បន្ទាប់ពីបើកត្រាក់ទ័រភ្ជួរដីចំការចំម៉ីនតោន១គ្រាប់ បណ្តាលឲ្យផ្ទុះ។
ករណីនេះបានកើតឡើងកាលពីវេលាម៉ោង១៣និង៣០នាទី ថ្ងៃសុក្រ ២រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី១៣ ខែធ្នូ ឆ្នាំ២០១៩ នៅត្រង់ចំណុចខាងត្បូងភ្នំហេងដាន ស្ថិតក្នុងភូមិហុងទឹក ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង។
ប្រភពព័ត៌មាន បានឲ្យដឹងថា ជនរងគ្រោះជាតៃកុងត្រាក់ទ័រមានឈ្មោះ គ្រី ប្រុស ភេទប្រុស អាយុ២៩ឆ្នាំ មុខរបរធ្វើចំការ មានទីលំនៅភូមិចក្រី ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង។
ប្រភពដដែលបន្តថា មុនពេលកើតហេតុគេបានឃើញជនរងគ្រោះ បើកត្រាក់ទ័រភ្ជួរដីចំការ ដើម្បីបង្កបង្កើនផលដូចសព្វមួយបង បន្ទាប់ពីដីនោះបានធ្វើការប្រមូលផលពោតរួចរាល់នាពេលថ្មីៗកន្លងទៅនេះ ក៏ស្រាប់តែពេលនេះកង់ត្រាក់ទ័ររបស់គាត់បានជាន់លើគ្រាប់ម៉ីនតោន១គ្រាប់ដែលបង្កប់នៅក្នុងដី បណ្តាលឲ្យផ្ទុះឡើងកក្រើកបង្កឲ្យមានការភ្ញាក់ផ្អើលដល់ប្រជាពលរដ្ឋ និងអាជ្ញាធរ មូលដ្ឋាននៅទីនោះ។
លោកវរសេនីយ៍ទោ សារ៉េត វិសេដ្ឋ អធិការ នគរបាលស្រុកភ្នំព្រឹកបានបញ្ជាក់ថា ដីចំការដែលកើតមានហេតុការខាងលើ ម្ចាស់ចំការធ្វើការភ្ជួររាស់ដាំដុះ បង្កបង្កើនផលជារៀងរាល់ឆ្នាំ ហើយពេលមុនៗមិនមានបញ្ហាអ្វីនោះទេ ទើបក្នុងថ្ងៃនេះជនរងគ្រោះភ្ជួរប៉ះចំគ្រាប់ម៉ីនតោនដែលបង្កប់នៅក្នុងដី បណ្តាលឲ្យកើតមានគ្រោះថ្នាក់បែបនេះ៕
