ផ្ទះចំនួន៣ខ្នង រងការឆាបឆេះអស់ទាំងស្រុង ដោយសារតែដុតខ្សែភ្លើងយកលួស
ខេត្តសៀមរាប៖ដោយសារតែដុតខ្សែភ្លើងយកលួស បណ្តាលឲ្យឆាបឆេះផ្ទះអស់ចំនួន៣ខ្នង កាលពីវេលាម៉ោង១៥និង៣០នាទី ថ្ងៃអង្គារ ១៤កើត ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១០ ខែធ្នូ ឆ្នាំ២០១៩ ស្ថិតនៅក្រុមទី០៨ ភូមិស្លក្រាម សង្កាត់ស្លក្រាម ក្រុងសៀមរាប ខេត្តសៀមរាប។
បើតាមរបាយការណ៍របស់សមត្ថកិច្ចបានឲ្យដឹងថា៖ម្ចាស់ផ្ទះដែលរងគ្រោះថ្នាក់ដោយសារអគ្គីភ័យឆាបឆេះនោះទី១:ជាម្ចាស់ដីឈ្មោះ មិត្ត ចំរើន ភេទប្រុស អាយុ៣៦ ឆ្នាំ បានជួលអោយឈ្មោះ យ៉ាង ភេទប្រុស អាយុ៤០ ឆ្នាំ ជនជាតិវៀតណាម(គេចខ្លួនបាត់)រស់នៅភូមិកើតហេតុខាងលើ បណ្តាលអោយរងការខូចខាតឆេះផ្ទះមួយខ្នងទាំងស្រុងដែលមានទំហំ៤ម៉ែតx ៦ម៉ែត្រ ធ្វើអំពីឈើប្រក់សង្ក័សី ជញ្ជាំងក្តារ សម្ភារះប្រើប្រាស់មួយចំនួនទៀត។
ផ្ទះទី២:ទំហំ៣ម៉ែត្រx ៦ម៉ែត្រ ធ្វើអំពីឈើ ប្រក់ស័ង្កសី ឆេះអស់ទាំងស្រុង ម្ចាស់មិននៅ។
ផ្ទះទី៣:ទំហំ៧ម៉ែត្រx៩ម៉ែត្រ កម្ពស់២ជាន់ ឈើលើថ្មក្រោម ប្រក់ក្បឿង ខូចខាត ដំបូលពិដាន និងជញ្ជាំង៣០% ដែលមានម្ចាស់ឈ្មោះ ស៊ាង ហុកសាយ ភេទប្រុស អាយុ៥៦ ឆ្នាំ មុខរបរនៅផ្ទះរស់នៅភូមិកើតហេតុខាងលើ។
សមត្ថកិច្ចបញ្ជាក់ថា៖នៅក្នុងហេតុការខាងលើនេះកម្លាំងបានប្រើប្រាស់រថយន្តពន្លត់អគ្គិភ័យចំនួន៨គ្រឿង
ទី១-រថយន្តអគ្គិភ័យ ស្នងការដ្ឋាននគរបាលខេត្តសៀមរាប ចំនួន០២គ្រឿង។
ទី២-រថយន្តពន្លត់អគ្គិភ័យ អធិការដ្ឋាននគរបាលក្រុងសៀមរាប ចំនួន១គ្រឿង។
ទី៣-រថយន្តពន្លត់អគ្គិភ័យ កងរាជវុធហត្ថចំនួន៣គ្រឿង។
ទី៤-រថយន្តពន្លត់អគ្គិភ័យ អាជ្ញាធរអប្សារា ចំនួន២គ្រឿង។
សមត្ថកិច្ចបញ្ជាក់ទៀតថា៖ករណីអគ្គីភ័យឆេះនេះមិនបណ្តាលអោយគ្រោះថ្នាក់ដល់មនុស្សឡើយ។
ពាក់ពន្ឋ័ទៅនឹងករណីអគ្គីភ័យខាងលើនេះបើតាមប្រភពព័ត៌មានបានឲ្យដឹងថា៖មូលហេតុដែលបណ្តាលឲ្យមានអគ្គីភ័យនេះកើតឡើងគឺ ដោយសារតែជនជាតិវៀតណាម ដែលជួលផ្ទះនៅក្បែរ ដុតខ្សែភ្លើងយកលួស បង្កអោយឆេះទាំងផ្ទះខ្លួនអ្នកជួល និងផ្ទះអ្នកដទៃចំនួន២ទៀត៕
