សម្តេចអគ្គមហាពញាចក្រី ហេង សំរិន ប្រធានរដ្ឋសភា អនុញ្ញាតឲ្យ ឯកអគ្គរដ្ឋទូត ប៉ាគីស្ថានចប់អាណត្តិចូលសម្តែងការគួរសមនិងជម្រាបលា
រាជធានីភ្នំពេញ៖នៅព្រឹកថ្ងៃទី១១ ខែធ្នូ ឆ្នាំ២០១៩នេះ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអនុញ្ញាតឲ្យ ឯកឧត្តម អាំចាទ អាលី ហ្សៀរ ( Amjad Ali Sher) ឯកអគ្គរដ្ឋទូត នៃសាធារណរដ្ឋអ៊ីស្លាមប៉ាគីស្ថានចប់អាណត្តិ ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម និងជម្រាបលា នៅវិមានរដ្ឋសភា។
ក្នុងឱកាសនោះឯកឧត្តម អាំចាទ អាលី ហ្សៀរ បានជម្រាបសម្តេចពីលទ្ធផលបេសកកម្មការទូតរបស់ខ្លួន ក្នុងរយៈពេល៦ឆ្នាំកន្លះ នៅកម្ពុជាថា បានចូលរួមចំណែកក្នុងការពង្រឹងពង្រីកចំណងមិត្តភាពនិងកិច្ចសហប្រតិបត្តិការរវាងប៉ាគីស្ថាននិងកម្ពុជាឲ្យកាន់តែរឹងមាំឡើង។រយៈពេលជាង៦ឆ្នាំក្នុងការស្នាក់នៅកម្ពុជា ឯកឧត្តមឯកអគ្គរដ្ឋទូត បានបានរៀនសូត្រនិងដកស្រង់បទពិសោធន៍ជាច្រើនពីកម្ពុជា ជាពិសេសឯកឧត្តមបានចាត់ទុកកម្ពុជាជាស្រុកកំណើតរបស់ខ្លួន។
ឯកឧត្តមអាំចាទ អាលី ហ្សៀរ បានមានប្រសាសន៍ថា ចំណងមិត្តភាព និងកិច្ចសហប្រតិបត្តិកម្ពុជា និងប៉ាគីស្ថានដែលមានតំាងពីយូរមក បានរីកចម្រើនរឹងមាំ ជាលំដាប់ទាំងខាងស្ថាប័ននីតិប្បញ្ញត្តិនិងនីតិប្រតិបត្តិ។ស្ថាប័ននីតិប្បញ្ញាត្តិសភាប្រទេសទំាងពីរបានគំាទ្រគ្នាទៅវិញទៅមកនៅលើវេទិកាអន្តរសភា។
កាលពីកន្លងទៅថ្មីៗនេះ ថ្នាក់ដឹកនាំសភាប៉ាគីស្ថាន បានអញ្ជើញមកចូលរួមវេទិកាអន្តរសភា ដែលសភាកម្ពុជាធ្វើជាម្ចាស់ផ្ទះ បន្តបន្ទាប់ រួមមានមហាសន្និបាតប្រចំាឆ្នាំសភាតំបន់អាស៊ី (APA)និងកិច្ចប្រជុំចំាឆ្នាំវេទិកាសភា-អាស៊ីប៉ាហ្វិក(APPF) ជាដើម។
ឯកឧត្តមឯកអគ្គរដ្ឋទូត បានគោរពអញ្ជើញសម្តេចអគ្គមហាពញាចក្រី ហេង សំរិន ដឹកនាំគណៈប្រតិភូជាន់ខ្ពស់រដ្ឋសភាកម្ពុជា ទៅបំពេញទស្សនកិច្ចផ្លូវការ និងមិត្តភាពនៅពេលវេលាសមស្របណាមួយ។
សម្តេចប្រធានរដ្ឋសភាបានទទួលយកការគោរអញ្ជើញនេះ។ជាមួយគ្នានេះ សម្តេចបាន កោតសរសើរ និងវាយតំលៃខ្ពស់ចំពោះកិច្ច ខិតខំប្រឹងប្រែង ក្នុងអាណត្តិបេសកកម្មការទូតរបស់ ឯកឧត្តម អាំចាទ អាលី ហ្សៀរ នៅកម្ពុជា ដែលបានរួមចំណែកលើកកម្ពស់ទំនាក់ទំនង មិត្តភាព និងកិច្ចសហប្រតិបត្តិការរវាង កម្ពុជា-ប៉ាគីស្ថាន ឲ្យមានការរីកចម្រើនថែមមួយកំរិតទៀត។សម្តេចសង្កត់ធ្ងន់ថា ស្នាដៃដ៏ប្រសើរនេះ មិនត្រឹមតែនាំមកនូវឧត្តមប្រយោជន៍ ដល់ប្រជាជាតិទាំងសងខាងប៉ុណ្ណោះទេ គឺបានរួមចំណែកយ៉ាង ខ្លាំងក្លាដល់ការថែរក្សាសុខសន្តិភាព នៅក្នុងតំបន់ និងសកលលោក ផងដែរ។
សម្តេចអគ្គមហាពញាចក្រី ហេង សំរិន ប្រធានរដ្ឋសភា បានសូមអរគុណប៉ាគីស្ថាន ដែលបានបញ្ជូនអ្នកសង្កេតការណ៍ឋានៈខ្ពស់សមាជិកព្រឹទ្ធសភា មកចូលរួមសង្កេតការបោះឆ្នោតជ្រើសរើសតំណាងរាស្ត្រ កាលពីឆ្នំា២០១៨ កន្លងទៅ និងបាន គ្រំាទ្រដល់ដំណើរការបោះឆ្នោតនោះ៕
